Kumanaan qof ayaa isugu soo baxay bartamaha London si ay uga qayb galaan laba isu soo bax oo kala duwan iyadoo magaalada la dhigay ciidamo badan oo sugaya amniga.
Mid ka mid ah dibadbaxyada waa isu soo baxa Maalinta Nakba, kaas oo ah mudaharaad sannadle ah oo ay soo qabanqaabiyaan isbahaysi ka kooban kooxo taageersan Falastiin.
“Nakba” macnaheedu waa “masiibo” Carabiga waxayna astaan u tahay barokaca in ka badan 700,000 oo Falastiiniyiin ah sanadkii 1948 intii lagu jiray dagaalkii Carabta iyo Israa’iil kaas oo horseeday aasaaska dawladda Israa’iil. Dagaalku wuxuu burburiyay boqolaal tuulooyin Falastiiniyiin ah wuxuuna si qasab ah u barakiciyay bulshooyinka Falastiiniyiinta.
Banaanbaxa maalinta ayaa astaan u noqotay doonista shacabka ee aqoonsiga Falastiiniyiinta, wuxuuna banaanbaxan sanadlaha ah sii xoogeystay kadib dagaalkii Gaza ee labada sano socday.
Booliiska Metropolitan-ka ee London ayaa ku sheegay warbixin gelinkii dambe in ay xireen 11 qof oo loo haysto “dambiyo kala duwan”, walow aysan faah faahin dheeraad ah weli ka bixin dadka la xiray.
Waxaa sidoo kale jira isu soo bax labaad oo barbar socda oo ka dhacaya London oo ujeedo aad uga duwan. Waxaa soo qabanqaabiyay hogaamiyaha midigta fog Tommy Robinson oo taageero ka hela Israel.
