Daadad xooggan iyo dhul-go’ ayaa ka dhacay waqooyiga Nepal, gaar ahaan dhulka ku dhow xadka Tibet…
Daadad xooggan iyo dhul-go’ ayaa ka dhacay waqooyiga Nepal, gaar ahaan dhulka ku dhow xadka Tibet ee Shiinaha, kaddib burbur baraf iyo dhagax ah oo sababay qulqul biyo iyo dhoobo aad u xooggan, masiibadaan ayaa burbur weyn u geysatay deegaanno iyo kaabayaal muhiim ah.
Ugu yaraan 19 buundo iyo ku dhowaad 40 kiiloomitir oo waddooyin ah ay daadadku qaadeen, waxaa kale oo la soo weriyey in 13 mashruuc oo koronto-dhaliye ah ay waxyeello soo gaartay, halka in ka badan 200 oo gaari xamuul ahna ay biyuhu la tageen.
Khasaaraha nafeed ayaa si weyn u kordhay intii lagu jiray howlaha gurmadka, iyadoo wararku sheegayaan in 300 qof ay ku dhinteen daadadka iyo dhul-go’a, halka in ka badan 1,300 qof lagu soo warramay inay weli maqan yihiin labada dhinac ee xadka Nepal iyo Tibet.
Howlgallada samatabbixinta ayaa ka socda deegaannada ugu daran, iyadoo ciidamada Nepal ay adeegsanayaan diyaaradaha qumaatiga u kaca, diyaaradaha aan duuliyaha lahayn iyo kooxo dhulka ah, iyadoo waddooyin iyo buundooyin go’ay ay adkeeyay in gargaar la gaarsiiyo dadka ku go’doonsan meelaha buuraleyda ah.
Dowladaha India iyo China ayaa ka mid ah dalalka bixiyay taageerada gurmadka. India waxay Nepal u dirtay sahay degdeg ah, oo ay ku jiraan teendhooyin, bustayaal, dawooyin iyo agab nadaafadeed, halka China ay waddo howlgallo samatabbixin ah oo ka socda dhinaceeda xadka.
