Warbixin cusub oo ay soo saartay xarunta cilmi-baarista ee Defense Priorities oo fadhigeedu yahay magaalada Washington…
Warbixin cusub oo ay soo saartay xarunta cilmi-baarista ee Defense Priorities oo fadhigeedu yahay magaalada Washington ee dalka Mareykanka, ayaa dood ka keentay sababaha Mareykanku u sii wado howlgalka militari iyo duqeymaha cirka ee uu ka fuliyo Soomaaliya. Warbixintu waxay ku talisay in si tartiib tartiib ah loo yareeyo, ugu dambayna loo soo afjaro faragelinta militari ee Mareykanka ka waddo dalka.
Warbixintu waxay sheegtay in kooxaha Al-Shabaab iyo garabka Daacish ee ka dagaallama Soomaaliya aysan muujin awood ama qorshe muuqda oo ay ku fuliyaan weerarro waaweyn oo si toos ah khatar ugu noqon kara gudaha Mareykanka. Sidaas darteed, waxay su’aal gelisay baahida loo qabo joogitaanka militari ee Mareykanka.
Sidoo kale, cilmi-baaristu waxay xustay in labada kooxood ay inta badan xoogga saaraan dagaalka gudaha Soomaaliya, iyadoo la tilmaamay in duqeymaha cirka iyo taageerada militari ee Mareykanku aysan weli si buuxda u wiiqin awooddooda ama u joojin dhaqdhaqaaqyadooda.
William Walldorf oo ah cilmi-baare sare oo ka tirsan xarunta Defense Priorities, ayaa sheegay in Mareykanku uu dano amni iyo istaraatiiji ah oo kooban ku leeyahay Soomaaliya. Wuxuu ku dooday in howlgalka hadda socda uusan si buuxda ula jaanqaadeyn danahaas, isla markaana loo baahan yahay dib-u-eegis lagu sameeyo siyaasadda militari ee Washington ee Soomaaliya.
Warbixintu waxay sidoo kale ku doodday in kooxaha hubeysan ee Soomaaliya aysan hadda khatar toos ah ku ahayn gudaha Mareykanka, iyadoo intaas ku dartay in howlgalka militari ee joogtada ahi uu suuragal yahay inuu sii huriyo colaadda halkii uu ka xallin lahaa.
Qiimeyntan ayaa kusoo beegmaysa xilli uu sare u kacay tirada duqeymaha Mareykanka ee Soomaaliya. Sida uu sheegay Taliska Ciidamada Mareykanka ee Afrika (AFRICOM), waxaa sannadkan la fuliyay ku dhowaad 80 duqeyn, halka sannadkii hore la diiwaangeliyay ku dhowaad 125 weerar oo cirka ah.
Warbixinta Defense Priorities waxay ka tarjumaysaa aragti ay qabaan qaar ka mid ah xarumaha cilmi-baarista ee Mareykanka, balse ma matasho mowqifka rasmiga ah ee dowladda Mareykanka. Dowladda Mareykanka ayaa weli ku adkeysata in duqeymaha iyo taageerada ay siiso ciidamada Soomaaliya ay qayb muhiim ah ka yihiin la dagaallanka Al-Shabaab iyo Daacish, isla markaana ay gacan ka geystaan xoojinta amniga gobolka.
