Wasiirka Gaashaandhigga Israa’iil, Yisrael Katz, ayaa maanta oo Khamiis ah ka digay in dalkiisu mar kale weerar ku qaadi doono Iran haddii ay helaan hanjabaad cusub oo ka timaada Tehran.
War-saxaafadeed ka soo baxay xafiiskiisa ayaa lagu sheegay: “Gacanta dheer ee Israa’iil waxay gaari doontaa Tehran, Tabriz, Isfahan, iyo meel kasta oo aad isku daydaan inaad uga hanjabtaan ama dhaawacdo Israa’iil.”
Maalmihii la soo dhaafay, Katz ayaa sheegay in ciidamada Israa’iil ay diyaarinayaan qorshe ay ku hubinayaan in Iran aysan mar kale hanjabeyn Israa’iil ka dib dagaalkii labada dhinac ay galeen oo socday 12 maalmood bishii Juun ee la soo dhaafay.
Katz ayaa intaa ku daray bayaan uu soo saaray inuu ciidamada Israa’iil ay tahay inay diyaar garoobaan labadaba dhinaca sirdoonka iyo hawlgallada, si loo xaqiijiyo inay diyaaradaha dagaalka ka awood badan yihiin Tehran, isla markaana looga hortago in Iran ay dib u soo ceshato awoodahii hore.
Waxaa xusuus mudan in 13-ka Juun Israa’iil ay dagaal ku qaaday Iran si looga hortago in Iran ay hesho hub nukliyeer ah. Tani waxay ku timid xilli Maraykanka iyo Iran ay wadahadallo ka wadeen barnaamijka nukliyeerka ee Tehran.
Dhowr maalmood kadib, Maraykanka ayaa farageliyey dagaalka, isagoo 22-ka Juun duqeyn ku qaaday goobta hoos timaadda ee uranium-ka ee Fordow oo ku taalla koonfurta Tehran, iyo labo xarumood oo nukliyeer ah oo ku yaalla Isfahan iyo Natanz (bartamaha dalka). Illaa iyo hadda lama oga inta uu le’eg yahay dhaawaca dhabta ah ee duqeynta ku gaartay goobahaas.
Ka dib markii Washington ay ku dhawaaqday xabbad-joojin, Ra’iisul Wasaaraha Israa’iil Benjamin Netanyahu ayaa ballanqaaday inuu ka hortagi doono in Iran ay dib u dhisto xarumahaas nukliyeerka, taasoo dhalisay suurtogalnimada in khilaafku mar kale soo noqdo.
Horseed Media
