Xafiiska Ra’iisul Wasaaraha Soomaaliya ayaa la dhaleeceeyay ka dib markii ay soo baxeen eedeymo sheegaya inay gacan ka geysaneyso fududeynta masaafurinta muwaadiniinta Soomaaliyeed ee ka imaanaya Sweden, iyadoo Stockholm ay xoojineyso dhaqangelinta go’aannada magangalyada ee la diiday iyo Tarxiilka.
Eedeymahan ayaa soo ifbaxay iyadoo ay sii kordhayaan baaritaannada ka socda Sweden ee ku saabsan heshiis dib loogu celinayo Soomaaliya kaas oo oggolaanaya in si qasab ah loogu celiyo muwaadiniinta Soomaaliyeed ee dacwadahooda magangalyo la diiday.
Dadka dhaliilaya go’aankan ayaa sheegaya in xafiisyada dowladda Soomaaliya, oo ay ku jiraan saraakiisha ku xiran xafiiska ra’iisul wasaaraha, ay si dhow ula shaqeynayaan mas’uuliyiinta Sweden si loo dedejiyo habraacyada dukumentiyada loo baahan yahay masaafurinta.
Warbaahinta Sweden ayaa horey u shaaciyey in lacagaha gargaarka horumarinta ee la siiyo Soomaaliya loo weeciyay qayb ahaan si loo taageero qaab-dhismeedka maamulka ee ku lug leh musaafurinta qaxootiga Soomaalida, taasoo walaac ka abuurtay kooxaha xuquuqda aadanaha iyo siyaasiyiinta mucaaradka ah ee dalka Sweden.
Dadka u dooda xuquuqda aadanaha ayaa ku doodaya in xaaladda amniga ee Soomaaliya iyo hay’adaha daciifka ah ay ka dhigayaan kuwo aan ammaan u ahayn soo celinta qasabka ah, waxayna ku eedeeyeen xukuumada Federaalka inay mudnaanta siinayso arrimaha siyaasadeed iyo maaliyadeed marka loo eego daryeelka muwaadiniinteeda dibadda u qaxay.
Dowladda Soomaaliya jawaab rasmi ah kama soo saarin eedeymaha.
Si kastaba ha ahaatee, ilo ku dhow Xafiiska Ra’iisul Wasaaraha ayaa sheegaya in iskaashiga Sweden loo qaabeeyey isku-dubarid farsamo waxayna ku adkeysanayaan inaysan la macno ahayn taageerid ama dhiirigelinta masaafuriska muwaadiniinta Soomaalida.
Sweden waxay difaacday siyaasadda soo celinta qaxootiga, iyadoo sheegtay in Soomaaliya ay aqbashay tobanaan qof oo masaafuris ah sannadihii la soo dhaafay, oo ay ku jiraan shaqsiyaad lagu helay dambiyo.
Stockholm waxay sidoo kale muujisay inay damacsan tahay inay si dhow ula xiriirto kaalmada horumarinta iyo rabitaanka waddamada ee ah inay aqbalaan muwaadiniinta lagu amray inay ka baxaan Sweden.
Qorshahan wuxuu sii huriyay doodda ka dhex jirta qurba-joogta Soomaalida ee Yurub, iyadoo kooxaha bulshadu ay ugu baaqayaan Muqdisho inay si cad uga soo horjeesato soo celinta qasabka ah.
