Published: March 19, 2022
Madaxweynaha Puntland Siciid Cabdullahi Deni ayaa xaflad caawa ka dhacday Madaxtooyada Garowe uga dhawaaqay inuu yahay murashax u taagan xilka Madaxweynaha dowlada Federaalka Soomaaliya.
Siciid Deni oo sheegay inuu in badan qarinayey arrintan ayaa sheegay inuu bilaabay hada ololihiisa doorashada isagoona si adag u dhaliilay Madaxweynaha Maxamed Cabdullahi Farmaajo.
Deni ayaa sheegay inuu ka shaqeenayo sidii meesha looga saari lahaa xukuumada uu hogaamiyo Maxamed Cabdullahi Farmaajo oo uu sheegay inuu khatar ku yahay xasiloonida iyo midnimada dalka.
Baaq uu u diray murashaxiinta kale ee xilka Madaxweynaha ayuu sheegay in loo baahan yahay in la iska kaashado sidii loogu midboobi lahaa inuusan dib usoo noqon Farmaajo.
Soomaaliya siyaasaddeedu waa mid aad u qasan oo qarannimadiina weli way qabyeysantahay. Sidaas aawadeed, dad aan kamid ahay ayaa waxaynu dagaalka Cabdullaahi Farmaajo kadhanka ah ee uu Saciid Dani macsharka hortiisa ka iclaamiyay u aragnaa qalad istraatiji ah ee uu si fiirala’aan ugu dhacay.
Dabcan, loollanka siyaasadeed ee siyaasiyiinta Soomaaliyeed kadhex oogan waxaa uu indhawaale isu rogay colaad qabow oo beelaha ay kasoo kala jeedaan kadhex aloosan, sidaas la ajligeedna ay muhiim tahay in hawraarta hawada la isku dhaafsanayo ay noqdaan kuwo miizaaman oo higillo waxsheeg oo mukhaawisanna la isugu adeeegsaday.
Saciid Dani waajibaad dheeri ah ayaa ka saaran qaabka uu baxarka siyaasadeed u dhex mushaaxayo, maadaama ay Jubbaland ka taagantahay dhibaato sokeeyenimo oo xasaasiyad iyo taxadder dheeri ah u baahan marka Farmaajo laga hadlayo. Sida muuqatana, Saciid Dani maanta sixun ayay uga hoos dustay markii uu macshar iyo media-ha hortooda ka iclaamiyay in uu Farmaajo duullaan toos ah kuyahay.