Dowlada Federaalka Soomaaliya ayaa caawa oo ay Salaaso soo galeyso ku dhawaaqday inay si rasmi ah xiriirka diblumaasiyadeed ugu jartay Dowlada ay jaarka yihiin ee Kenya.
Warka oo uu akhriyey Wasiirka Warfaafinta Cismaan Abuukar Dubbe ayaa lagu sheegay in go’aankan yimid kadib markii Kenya ay joojin weyday faro-gelinta ay ku heyso madax-banaanida wadanka Soomaaliya.
Dowlada Federaalka Soomaaliya ayaa u qabatay diblumaasiyiinta Kenya ka jooga gudaha Soomaaliya inay wadanka isaga baxaan muddo 7 maalmood gudahood ah, iyadoo sidoo kale loo yeeray Diblumaasiyiinta Soomaalida ee Kenya ku sugan inay wadankooda kusoo noqdaan.
Dowladda Federaalka Soomaaliya iyada oo ka duuleysa madaxbannaanideeda qarannimo ee uu dammaanad qaadayo xeerka iyo qaanuunka caalamiga ah, gudanaysana waajibka dastuuriga ah ee ka saaran ilaalinta midnimada, qaranimada iyo xasilloonida dalka waxa ay go’aansatay in ay xiriirka diblumaasiyadeed u jarto Dowladda Kenya.
Dowladda Federaalka Soomaaliya waxa ay u yeeranaysaa dhammaan diblomaasiyiinteeda ka jooga Kenya in ay dib ugu soo laabtaan dalkooda, waxayna ku amraysaa kuwa halkan ka jooga Dowladda Kenya in ay dalka kaga baxaan muddo 7 maalmood ah oo ka bilaabaysa 15-ka Diseembar 2020.
Shacabka Kenya: Dowladda Federaalka Soomaaliya waxay u aragtaa shacabka Kenya inuu yahay shacab jecel nabadda iyo wada noolaashaha shucuubta gobolka, ayna kala dhaxayso shacabka Soomaaliyeed xiriir qotodheer oo ku dhisan deris wanaag iyo wax wada qabsi. Balse hoggaanka maanta ee Dowladda Kenya uu ka shaqeynayno kala fogeynta labada shacab ee dan-wadaagta ah.
Sababta Go’aanka: Dowladda Federaalka Soomaaliya waxay u gaartay go’aankan si ay uga jawaabto xad-gudubyada siyaasadeed iyo fara-gelinta qaawan ee isdaba joogga ah ee muddoonyinkii ugu dambeeyey ay dowladda Kenya Ku haysay madax-banaanida dalkeenna.
Ugu Dambayn: Dowladda Federalka Soomaaliya waxa ay xaqiijinaysaa madaxbanaanida, qaranimada iyo midnimada ummadda soomaaliyeed si waafaqsan Dastuurka dalka, shuruucda iyo xeerarka caalamiga ah. Wax gorgortan ahna haba yaraatee Dowladdu kama gelayso xorriyadda, madaxbanaanida iyo qaranimada ummadda Soomaaliyeed.
Wasiirka Warfaafinta Cismaan Abuukar Dubbe
Horseed Media
