Midowga Yurub, Urur-goboleedka IGAD, Midowga Afrika iyo Qaramada Midoobey wakiilo ka socda ayaa shir fogaan arag…
Midowga Yurub, Urur-goboleedka IGAD, Midowga Afrika iyo Qaramada Midoobey wakiilo ka socda ayaa shir fogaan arag ah ka yeeshey xaaladda cakiran ee dalka, shirkan ayaa lagu sheegay in ay si ba’an uga welwelsan yihiin xaaladda siyaasadeed ee Soomaaliya ee cakiran, waxaana shirka ka qaybgalay.
Dr. Workneh Gebeyehu, Xoghayaha Fulinta ee IGAD; Amb. Bankole Adeoye, Wakiilka Midowga Afrika ee Arrimaha Siyaasadda, Nabadda iyo Amniga; Amb. Rita Laranjinha, Midowga Yurub, Agaasimaha Guud ee Afrika; iyo Rosemary DiCarlo, Xoghayaha Guud ee Qaramada Midoobay ee arrimaha Siyaasadda iyo Nabadeynta.
Shirkan ayaa ujeedadiisu ahayd in la derso iyada oo fiirinayo culeyska ismariwaaga siyaasadeed ee ka jira Soomaaliya ee ku aadan qabsoomida doorashooyinka dib u dhaca ku yimid, iyo ismari waaga wali ka taagan wadahadaladii u dhaxeeyay dowladda Federaalka iyo qaar ka mid ah madaxda dowlad goboleedyada xubnaha ka ah Federaalka.
Beesha calamka ayaa mar kale ku celisey ixtiraamka ay u hayaan madax-bannaanida, midnimada dhuleed, madax-bannaanida siyaasadeed iyo midnimada Soomaaliya; waxayna ugu baaqeen madaxda Soomaalida inay mudnaanta siiyaan danaha qaranka Soomaaliyeed ayna si dhakhso leh ugu laabtaan wadahadalka si loo raadiyo tanaasul ku saabsan arrimaha taagan, iyo in la hubiyo in aan la qaadin tallaabooyin wax u dhimaya xasilloonida Soomaaliya, taas oo muhiim u ah ilaalinta nabadda adduunka. iyo amniga.
Bayaanka ayaa lagu yir: Waxay hoosta ka xariiqaynaa in heshiiskii Sebtember 17 uu weli yahay dariiqa ugu macquulsan ee lagu gaari karo qabsoomidda doorashooyinka muddada ugu yar ee suurtagalka ah, waxaana ku boorineynaa Dowladda Federaalka iyo hoggaamiyeyaasha Dowlad Goboleedyada Xubnaha ka ah Federaalka in ay dib u eegis ku sameeyaan oo ay ansaxiyaan Guddiga Farsamada ee 16-ka Febraayo 2021, talo soo jeedintooda iyo raadinta heshiis oo loo tanaasulo wixii arrimo ah ee taagan ee lagama maarmaanka u ah hirgelinta doorashada si deg deg ah;
Sidoo kale Bayaankan oo kamid ahaa kuwa ugu adag ee si wada jir ah loo soo saaro ayaa loogu baaqey Soomaalidu in ay ka mahadceliso kuna qanacdo dedaalka ay wadaan Saaxiibadda Caalamiga ah ee hawlaha la fududeynaya, waxaana loogu baaqey in ay hagaajiyaan xiriirka ay la leeyihiin xafiisyadaas, ayna taageeraan soo noqoshada wada hadalka.
EU, IGAD, AU iyo UN ku waxay dib-u-xaqiijiyeen go’aanka ah in aan la taageerin geeddi-socod kasta oo is-barbar socda, doorashooyinka qaybyo ah, ama muddo kordhin hay’adaha hadda xuilku ka dhamaadey.
Beesha caalamka ayaa walaac ka muujisey in ismariwaaga siyaasadeed uu saameyn xun ku yeesho nabada, amniga, xasiloonida, iyo barwaaqada Soomaaliya iyo dalalka kale;
Ugu danbeyntii ayaa Bayaanka lagu yiri waxaan ugu baaqayaa hogaamiyaasha siyaasada Soomaaliya inay sii wadaan horumarka laga sameeyay dhismaha dowladnimada iyo siyaasada loo dhan yahay, gaar ahaan doorashooyinka iyo kala wareejinta awooda iyo nabada, waxaan ka codsanayaa hogaamiyaashaas inay maanta gaarsiiyaan danaha muhiimka ah ee dadka Soomaaliyeed si nabad, xor, cadaalad ah , iyo doorashooyin lagu kalsoonaan karo. Waxaan Ku boorrineynaa dhammaan hoggaamiyeyaasha Soomaalida inay is xakameeyaan oo ay ka waantoobaan ficillada horseedi kara xiisadaha oo sii xumaada.
Cabdirsaaq Shiino
Horseed Media
