Midowga Yurub ayaa ansixiyay kordhinta istaraatiijiyadeed ee howlgalladooda militari iyo kuwa rayidka ah ee Soomaaliya.
Golaha Midowga Yurub ayaa ansixiyay sii wadida howlgallada baaxadda leh ee dhanka badda iyo amniga ee Soomaaliya, iyadoo lagu kordhiyay saddex howlgal oo muhiim ah ilaa 28-ka Febraayo 2027. Go’aankan ayaa lagu dhawaaqay maalintii shalay ee Diseembar 16, 2024.
Howlgallada la kordhiyay ayaa waxaa ka mid ah Howlgalka ATALANTA, Howlgalka Tababarka Milatari ee Midowga Yurub (EUTM Somalia), iyo Howlgalka Dhisida Awoodda Rayidka ee Midowga Yurub (EUCAP Somalia). Kordhintaani waxay timi ka dib markii dib-u-eegis istiraatiiji ah lagu sameeyay ku hawlgelinta Siyaasadda Amniga iyo Difaaca Wadajirka ee Midowga Yurub (CSDP) ee gobolka.
Hawlgalka ATALANTA waxa uu sii wadi doonaa shaqadiisa muhiimka ah ee la dagaalanka burcad-badeedda iyo dhimista ka ganacsiga sharci darrada ah ee badda Gacanka Cadmeed, Galbeedka Badweynta Hindiya, iyo qaybo ka mid ah Badda Cas. Hawlgalku wuxuu hadda raadin doonaa inuu kor u qaado ammaanka badda iyo in la dhiso qaab-dhismeedka amniga badda ee gobolka.
Horumarka la taaban karo ayaa ah iskaashiga kordhay ee ATALANTA iyo Hawlgalka ASPIDES, kaas oo ilaaliya maraakiibta ganacsiga ee badda cas. Xarunta Badbaadada Badaha waxaa loo beddelay MSC Badweynta Hindiya, iyadoo doorkeeda la ballaariyay si loo taageero hawlgalladan badda.
Howlgallada Midowga Yurub ayaa sidoo kale diiradda saari doona taageeridda hay’adaha amniga Soomaaliya, bixinta la-talinta istiraatiijiga ah, la-talinta, iyo tababarrada si ay Soomaaliya si tartiib tartiib ah u qaadato mas’uuliyadda amnigeeda. Habkani wuxuu la jaan qaadayaa Qorshaha Wadajirka ah ee EU-Somalia waxaana lagu taageeri doonaa maalgelinta qalabka iyada oo loo marayo Xarunta Nabadda ee Yurub.
Goluhu wuxuu carrabka ku adkeeyay in dhammaan waxqabadyada ay mudnaanta siin doonaan qiyamka aasaasiga ah ee Midowga Yurub, oo ay ku jiraan:
-U hoggaansanaanta sharciga caalamiga ah ee bini’aadantinimada
- Ilaalinta xuquuqda aadanaha
- Ka hortagga xadgudubyada ku saleysan jinsiga
- Ka ilaalinta carruurta isku dhacyada hubaysan
- Horumarinta ka qaybgalka haweenka ee nabadda iyo amniga
- Wax ka qabashada isbeddelka cimilada, amniga, iyo difaaca
HORSEED MEDIA
