Guddiga doorashada dalka Ghana ayaa Isniintii ku dhawaaqay in madaxweynihii hore oo ah hoggaamiyaha mucaaradka John Dramani Mahama uu ku guuleystay doorashadii madaxtinimo ee Sabtidii dhacday isagoo helay 56.55% codadkii la dhiibtay, marka loo eego natiijooyinka ku meel gaarka ah.
Guddiga doorashada ayaa sheegay in ay tiriyeen codadka 267 ka mid ah 276-da degmo doorasho ee dalka Galbeedka Afrika. Dadka u soo baxay doorashada ayaa ahaa 60.9%.
Mahama, oo 66 jir ah, ayaa dib u soo laba-kaclaynaya maadaama uu horey usoo noqday madaxweynaha Ghana 2012 ilaa 2016.
“Waajibkani waxa uu xasuusin joogto ah u noqonayaa waxa na sugaya haddii aynu ku guulaysano himilada shacabkeena,” ayuu u sheegay John Dramani Mahama, boqollaal taageerayaashiisa ah oo ku sugan goobaha uu ololaha kaga jirey.
Horseed Media
