Duqaymaha Israa’iil ayaa dilay ugu yaraan 26 qof, oo ay ku jiraan siddeed carruur ah, sida ay Sabtidii sheegtay wakaaladda difaaca madaniga ah ee Gaza.
Dagaalka Israa’iil iyo Xamaas oo weli socda, oo hadda galay sannadkiisii labaad, ayaa sababay dhimashada 45,717 qof, sida ay sheegtay wasaaradda caafimaadka ee dhulka ay Xamaas maamusho.
Samatabbixiyeyaasha Gaza ayaa Sabtidii sheegay in duqaymaha Israa’iil ee guud ahaan dhulka falastiiniyiinta ay ku dhinteen ugu yaraan 26 qof, maalin uun ka dib markii xoogagga Xamaas ay sheegeen in wadahadallada nabadeed ay dib u bilaabmayaan.
Hay’adda difaaca madaniga ah ayaa sheegtay in weerar dhinaca cirka ah oo subaxnimadii hore ee saaka lagu qaaday guriga qoyska al-Ghoula ee magaalada Gaza ay ku dhinteen 11 qof oo 7 ka mid ah ay carruur ahaayeen.
Sawirro ay saxaafadda ka soo qaaday xaafadda Shujaiya ee magaalada Qasa ayaa muujinayay Meydad ay ku jiraan caruur yar yar.
Gelinkii dambe ee Jimcihii Xamaas waxa ay sheegtay in wada-xaajoodyada dadban ee Israa’iil ay dib uga bilaabmayaan Qatar.
Dhexdhexaadiyeyaasha Qatar, Masar iyo Maraykanka ayaa ku hawlanaa dadaalo bilo ah oo lagu guuldareystay in lagu soo afjaro ku dhawaad 15 bilood oo dagaal ah.
Caqabadda ugu weyn ee hortaagan heshiiska ayaa ah diidmada Israa’iil ee ah in ay ogolaato xabbad joojin waarta.
Horseed Media
