Daadad ba’an ayaa dumiyey darbi ku yaalla xabsiga Maiduguri ee waqooyi bari Nigeria horraantii todobaadkii hore, taasoo u ogolaatay 281 maxbuus inay baxsadaan, maamulka xabsiga ayaa sheegay Axadii.
Todobo ka mid ah maxaabiistii baxsatay ayaa lagu soo qabtay howlgalo ay sameeyeen laamaha amaanka, Umar Abubakar, afhayeenka ciidamada asluubta Nigeria ayaa bayaan ku sheegay.
“Daadadku waxay soo dumiyeen darbiyada xarumaha asluubta oo ay ku jirto xarunta dhexe ee amniga, iyo sidoo kale guryaha shaqaalaha ee magaalada,” ayuu yiri Abuubakar.
Howlgallo lagu soo celinayo inta ka hartay maxaabiista ayuu sheegay in ay socdeen.
Maiduguri waa caasimadda gobolka Borno oo horraantii usbuucii hore ay la kulmeen daadadkii ugu xumaa muddo tobanaan sano ah. Daadadkan ayaa billowday markii biyo-xireen ay buux dhaafiyeen roobab mahiigaan ah oo da’ay, kaasoo baabi’iyay goob lagu xanaaneeyo xoolaha oo ay dowladdu leedahay, waxaana yaxaasyada iyo masaska lagu dhaqay bulshooyinkii ay daadadku soo galeen.
Daadadka ayaa dilay ugu yaraan 30 qof sida ay sheegtay hay’adda gargaarka degdegga ah ee dalkaas, waxaana ay saameysay hal milyan oo kale, iyadoo boqolaal kun oo qof ay ku qasbeen xeryo ay ku jiraan dad barakacayaal ah.
Horseed Media
