Guddoomiyaha gobolka Banaadir ahna duqa magaalada Muqdisho Mudane Cabdiraxmaan Cumar Cusmaan (Eng. Yarisow) ayaa kulan la qaatay qeybta maamulka iyo Maaliyadda gobolka Benaadir, iyadoo warbixinno kala duwan looga dhegeystay agaasimeyaasha dakhliyada kala duwan oo soo bandhigay dakhligii soo xarooday sanadkii hore, si loo qorsheeyo dakhliga uu sanadkan ku howlgeli lahaa gobolka Banaadir.
Mudane Yarisow ayaa xusay dar-dargelinta howlaha dakhliyadu in door muhiim ah ay ka qaadanayaan horumar walba oo la qorshaynayo in la sameeyo sanadkan 2018. Si loo xaqiijiyo arrimahanna ay ka dhigan tahay in si joogta ah loo shaqeeyo 24 saacadood iyo toddobada maalmood.
“Kulankani wuxuu qeyb ka yahay qorshaha aan uga fekereyno maareynta dakhliyada sanadkan 2018 iyo xisaab xirka dakhligii soo xarooday sanadkii hore. Waxaan diyaar u nahay in aan waxba qarsoonaan bulshadana usoo bandhigno meesha ay ku baxdo canshuurtii ay bixiyeen,waxaan ka codsanayaa bulshada iney nala shaqeeyaan lana bixiyo cashuurta dowladda si horumar loo gaaro”.Ayuu yiri Guddoomiye Yarisow.
Guddoomiyaha gobolka Banaadir ahna duqa magaalada Muqdisho Mudane Cabdiraxmaan Cumar Cusmaan waxuu xusay dawladda hoose ee Xamar in qorsheedu uu yahay sanadkan 2018 horumar baaxad leh in laga sameeyo adeegyada kala duwan ee laga bixiyo Caasimadda, taasina ay qabsoomi karto marka la helo dhaqaale bixiyaal iyo maareeyaal fiican, dhankoodana ay xil weyn iska saaraya dhaqaalaha dadku leeyahay in uu ku baxo wax la taaban karo.
Horseed Media 2018
