Soomaaliya ayaa si rasmi ah u codsatay in dib loo dhigo dhimista ciidamada ka socota MIdowga…
Soomaaliya ayaa si rasmi ah u codsatay in dib loo dhigo dhimista ciidamada ka socota MIdowga Afrika, iyadoo codsi u dirtay golaha ammaanka ee Qaramada Midoobay (UNSC) si ay wax uga qabato dal-daloolooyin amni oo halis ah.
Tallaabadan ayaa imaanaysa iyadoo wejiga hore 3,000-askari ee ciidamada Midowga Afrika ee ATMIS ka baxayaan Soomaaliya dhammaadka Sebtembar 2023 waxaana lagu waday inuu sii socdo illaa December 2024-ka.
Warqad ku taariikheysneyd Sebtembar 19, oo uu ku saxiixnaa La-Taliyaha Amniga Qaranka Soomaaliya, Xuseen Sheekh Cali, ayaa ku booriyay UNSC inay ka fiirsadaan “hakin farsamo” oo saddex bilood ah oo ku saabsan dhimista. Codsiga waxaa lagu caddeeyey walaacyo lagu sheegay warbixinta Qiimaynta Farsamo ee Wadajirka ah, taasoo muujisay “caqabado waaweyn” oo si weyn u saameyn kara isbeddelka amniga ee Soomaaliya.
Sida qorshuhu ahaa markii hore, ATMIS waxaa loo qorsheeyay in ay ku wareejiso shan xarumood oo ay ku jiraan xarumaha muhiimka ah sida Aqalka Madaxtooyada, Baarlamaanka, Garoonka Diyaaradaha ee Kismaayo, Dhuusomareeb, iyo Saldhigga Biyo Cadde. Intaa waxaa dheer, in afar saldhig, gaar ahaan Saliile, Burhashi, Regaase, iyo Qorilow, ay ahayd in si joogto ah loo xiro hawsha.
Codsiga dowladda Soomaaliya ee ku aadan dib u dhigista qorshaha dhimista ayaa ku soo aadaya iyadoo 17-kii September ay ATMIS ku wareejisay Maamulka Biyo Cadde ee Dowlad Goboleedka Hirshabeelle.
Waxaa cabsida sii xumeeyay dib u dhac ku yimid weeraradii ugu dambeeyay ee kooxda argagixisada Al-Shabaab ay ku qaadeen ciidamada amaanka Soomaaliya, gaar ahaan dagaalkii Cawsweyne.
Codsiga dib u dhaca ku yimid dhimista ciidamada ATMIS ayaa keentay in la isla dhex maro sida ay UNSC uga jawaabi doonto. Iyadoo aan la hubin natiijada ka soo bixi doonta, haddana welwelka ay dowladda Soomaaliya ka qabto gal-daloolooyinka amni ayaa loo arkaa mid sax ah, marka loo eego xaaladda ammaan ee qaranka oo jilicsan.
Marka ay xaaladdu sidaas tahay ayaa beesha caalamka waxay si gaar ah isha ugu heyn doontaa sida ay UNSC u wajahdo codsiga Soomaaliya, iyo in meel dhexe la isugu imaan karo si loo sugo amniga dalka inta lagu guda jiro kala guurka.
Horseed Media
