Madaxweynaha la doortay ee dalka Maraykanka Donald Trump ayaa u magacaabay xoghayaha gaashaandhiga Pete Hegseth, oo ah khabiir ka tirsan warbaahinta Fox News, qoraa iyo militari.
Hegseth, oo 44 jir ah, kana soo shaqeeyay Afgaanistaan iyo Ciraaq, ayaa mas’uul ka noqon doona militariga ugu awoodda badan adduunka doorkiisii ugu horreeyay ee siyaasadeed.
Trump wuxuu ku tilmaamay inuu yahay nin “adag, caqli badan oo si dhab ah u rumaysan “America First”.
Warkan ayaa soo baxay isla maalintii uu Trump ku dhawaaqay nin kale oo ku cusub siyaasadda, waa bilyaneer-ka Elon Musk, in uu qaadan doono doorka dhimista kharashaadka dawladda iyo burburinta xafiisyada aan loo baahneyn.
Hadii uu helo taageerada Senate-ka Mareykanka, Hegseth waxa uu imaanayaa Pentagon-ka isaga oo ay tahay in uu go’aano ka qaato arrimo ay ka mid yihiin dagaalka Gaza, iyo in Ukraine laga taageero duulaanka Ruushka.
Trump wuxuu rabaa in Mareykanka uu iska fogeeyo isku dhacyada shisheeye guud ahaan. Intii lagu guda jiray ololihii doorashada, wuxuu dhaleeceeyay kharashaadka maamulka Biden ku taageeray Kyiv.
Magacaabista Trumpp ayaa hadda ku socota mid uu ku xulanaayo dadka daacadda u ahaa mudadii uu siyaasadda ku soo jirey.
HORSEED MEDIA
