Maxamed Xareed Faarax Ku xigeenka Xeer Ilaaliyaha guud ee dowladda Puntland oo warbaahinta kula hadlay Magaalada…
Maxamed Xareed Faarax Ku xigeenka Xeer Ilaaliyaha guud ee dowladda Puntland oo warbaahinta kula hadlay Magaalada Garoowe, ayaa si faah-faahsan uga hadlay dadka hantida leh ee la dhuunta canshuurta ku waajibtay.
Mr Xareed ayaa sheegay in fasax ay u tahay dowladdu inay la wareegi karto badeecad kasta oo ka soo degta furdooyinka Puntland, haddii lagala dhuunto Canshuurta ku waaajibtay ee dawladu ay xaqa u leedahay.
“ Xafiiska Xeer Ilaalinta guud ee dowladda Puntland, wuxuu la socod-siinaya dhammaan ganacsatada, haddii badeecadaha ka soo dega furdooyinka Puntland lagala baxsado Canshuurta ku waajibtay, iyadoo lagu xad-gudbayo xeerarka Wasaaradda Maaliyadda, waxaan u sheegayna ganacsatada in dhammaan badeecaddaas ay la wareegayso dowladda” ayuu yiri Maxamed Xareed
Ku xigeenka Xeer Ilaaliyaha guud ee Puntland ayaa sidoo kale dowladda u fasaxay in ay la wareegi karto gaadiid kasta oo lagu qabto kotorobaan (shay aan sharciyaysneyn), waxaana uu ku hanjabay in cid kasta oo leh gaadiidkaas sharciga la hor-geyn doono.
Ugu danbayn wuxuu sheegay in ganacsade kasta oo lagu qabto in uu canshuur la dhuuntay, ay Xeer ilaalintu ku soo oogi doonto dacwad-ciqaabeedka uu mutaystay, islamarkaana la hor-geyn doono maxkamadaha Sharciga u leh qaadista dacwaddaas.
Horseed Media 2020
