Hawlgalkan oo ay wadajir isaga kaashadeen Ciidanka Qaranka Soomaaliya iyo Ciidamada Cirka ee Mareykanka ayaa ka dhacay deegaanka Beerxaani oo qiyaastii 35km waqooyi galbeed ka xiga magaalada Kismaayo ee xarunta ku meelgaarka ee Jubbaland.
Hawlagalkan lagu burburiyay koox ka tirsan Khawaarijta oo soo abaabulay isla markaana damacsanaa inay soo qaadaan weerar qorsheysan ayaa waxaa looga hortagey waxyeeladii ay doonayeen inay geystaan. Xogta khasaaraha horudhaca ah ee gaaray cadowga inta la xaqiijiyay ayaa gaaraysa ilaa 10 dhimasho ah, mana jirin wax khasaare ah oo soo gaaray rayidka.
Ciidanka Qaranka Soomaaliya oo kaashanaya saaxiibada Caalamka oo Ciidanka Mareykanka ay qeyb weyn ka yihiin, ayaa waxaa ka go’an ciribtirka Khawaarijta iyo ka hortagga weerarada abaabulan ee kooxdu ku doonayso in ay ku dhibaatayso shacabka Soomaaliyeed.
