Wargeyska New York Times ayaa sheegay in kooxda kala guurka ah ee madaxweynaha la doortay ee…
Wargeyska New York Times ayaa sheegay in kooxda kala guurka ah ee madaxweynaha la doortay ee Maraykanka Donald Trump ay isku diyaarinayaan in ay ka baxaan heshiiskii cimilada ee Paris iyo in ay u ogolaadaan sahaminta iyo macdan qodista dalkiisa.
Warbixin uu qoray wargeyska ayaa lagu sheegay in Trump sidoo kale la filayo inuu soo afjaro joojinta ku meel gaarka ah ee lagu soo rogay shatiyada lagu dhisayo xarumo cusub oo laga dhoofiyo gaaska dabiiciga ah, iyo inuu baabi’iyo ka-dhaafitaanka u oggolaanaya California iyo gobollada kale inay adeegsadaan heerar adag oo ka-hortagga wasakhowga.
Intii lagu guda jiray ololihii doorashada, Trump wuxuu ballan qaaday inuu qaadi doono tallaabooyin badan oo lagu xusay warbixinta. Carolyn Levatt, oo ah af hayeen u hadashay kooxda Trump ee kala guurka ah, ayaa sheegtay – iyadoo ka jawaabaysa codsi uga yimid wakaaladda wararka ee Reuters – in natiijadii doorashada Talaadadii ay siisay “waajib uu ku fulinayo ballanqaadyadii uu sameeyay intii uu ku jiray ololihiisa doorashada, wuuna ilaalin doonaa.”
Maamulka madaxweynaha xilka kasii dagaya Joe Biden ayaa hakiyay ansixinta dhoofinta dareeraha cusub ee gaaska dabiiciga ah bishii Janaayo ee lasoo dhaafay si loo dhamaystiro daraasad ku saabsan saamaynta deegaanka iyo dhaqaalaha ee dhoofinta.
Sarkaal ka tirsan Waaxda Tamarta ee Mareykanka ayaa sheegay in wasaaraddu ay diyaarin doonto falanqayn qabyo ah oo la cusboonaysiiyay, waxayna u furnaan doontaa faallooyinka dadweynaha 60 maalmood ka hor dhammaadka sanadka.
Warbixintu waxa ay soo xigatay dad ku lug lahaa doodaha in qaar ka mid ah xubnaha kooxda kala guurka ay ka wada hadlayaan in xarunta EPA laga saaro Washington.
Waxaa xusid mudan in sannadkii 2015-kii uu Maraykanku dunida intiisa kale ku riixay inay saxeexaan heshiiska Cimilada ee Paris, iyadoo ujeedadu ahayd in la dhimo qiiqa hawada lagu sii daayo, iyadoo la isku dayay in la yareeyo isbeddelka cimilada, waxayna ahayd hal sano ka hor dhammaadka xilligii Barack. Madaxweyne Obama.
Horseed Media
