Madaxweyne hore Maxamed Cabdullahi Farmaajo ayaa si weyn uga soo horjeestey isbeddelka weyn ee madaxweyne Xasan…
Madaxweyne hore Maxamed Cabdullahi Farmaajo ayaa si weyn uga soo horjeestey isbeddelka weyn ee madaxweyne Xasan Sheekh doonaayo in uu ku sameeyo masiirka dalka, gaar ahaan laba xisbi siyaasadeed, raysalwasaaraha oo meesha laga saaro, madaxweyne iyo ku xigeena la sameeyo meeshana laga saaro raysalwasaaraha.
Madaxweyne Farmaajo ayaa sidoo kale adkeeyey in dowladda hadda jirta awoodeeda aysan ahayn in isbeddel intaas le’eg ay samayso, taas oo horseedi karta qalalaase cusub.
Qoraal kasoo baxay Madaxweyne hore Maxamed Cabdullahi Farmaajo ayaa lagu yiri:-
“Waxaan si dhow ula soconnaa dhaqdhaqaaqyada ku aaddan wax ka beddelka qaabka dowladnimada, hanaanka baarlamaaniga ah, habka doorashooyinka qof iyo codka ah iyo hannaanka xisbiyada badan. Wax ka bedelka qodobadaas oo aan loo marin wadada saxda ah waxay keeni karaan in dalku uu dib ugu noqdo xasilooni darro iyo hubanti la’aan.
Sidaas darteed in laga guuro hannaanka Baarlamaaniga ah ee ka jira dalkeenna, lana laalo xafiiska Ra’iisul Wasaaraha waa masuuliyad ka baxsan awoodaha Hay’adaha Dawladda, maadaama ay taabanayso masiirka dalka.
Baarlamaanka Federalka Soomaaliya waxaa waajib qaran iyo mid taariikhi ah ka saaran yahay in ay ka digtoonaadaan ansixinta qodobbada taabanaya jiritaanka dowladnimada ee aan loo marin hannaanka saxda ah, kuwaas oo abuuri kara kalsooni darro bulsho iyo jahwareer siyaasadeed.
Waxaan garowsannahay ahmiyadda ay leedahay in la maqlo codka Dowlad Goboleedka Puntland oo ka maqan Madasha Wadatashiga Qaran si loo xaqiijiyo matalaaddooda ku aaddan arimaha masiiriga ah, taas oo aan looga maarmayn dawlad dhiska Soomaaliya.
Shacabka Soomaaliyeed xaq ayey u leeyihiin in ay hoggaankooda ku soo doortaan codkooda, si xor iyo xalaal ah oo daahfuran, waafaqsanna xeerarka iyo shuruucda dalka”
Horseed Media