Madaxa howlgalka ATMIS ayaa ku baaqay taageero caalami ah oo la siiyo ciidamada dowladda federaalka Soomaaliya…
Madaxa howlgalka ATMIS ayaa ku baaqay taageero caalami ah oo la siiyo ciidamada dowladda federaalka Soomaaliya oo meelo kala duwan oo dalka ah kula dagaalamaya kooxda Al-Shabaab.
Maxamed El-Amine Souef ayaa sheegay in ciidamada Soomaaliya aysan u baahneyn tababar oo kaliya balse ay u baahan yihiin hub, qalab iyo xirfado ay ku shaqeystaan saraakiisha iyo in laga qaado cunaqabateynta hubka si dalka uu hub u soo iibsado.
Wareysi uu siiyay VOA Somali, ayuu Souef ku sheegay in Soomaaliya ay leedahay “ciidan dhalinyaro ah” ayna mas’uuliyad ka saaran tahay, ayna beesha caalamka mas’uuliyad ka saaran tahay inay ku taageeraan hub, rasaas iyo aqoon xirfadeed.
“Waxaad aragteen waxa Israa’iil ka dhacay, arrinta u dhaxaysa Xamaas iyo Israa’iil, isla markiiba saaxiibadooda, oo uu ku jiro Maraykanku, waxay isla markiiba qaateen go’aan ay ku taageerayaan Israa’iil xagga hubka iyo rasaasta,” ayuu yiri, isagoo soo xiganaya dagaalka Israa’iil-Xamas, kaas oo sababay in Maraykanku u diro gargaar milatari oo degdeg ah maalmo gudahood.
“Waxay ila tahay in Soomaalidu hadda la daalaa dhacayso cunaqabataynta hubka… taas oo ay tahay in la qaado.”
Mohamed El-Amine Souef
Souef ayaa sheegay in qaar ka mid ah dalalka ciidamada u soo diray Soomaaliya ay ku heshiiyeen in ay qalab, gaadiid, iyo qoryo ugu deeqaan ciidamada Soomaaliya marka ay ka baxaan bisha December ee sanadka soo socda.
Waxa uu xaqiijiyay in Golaha Ammaanka iyo Nabadda ee Midowga Afrika uu ansixiyay codsigii Soomaaliya ee ahaa in muddo saddex bilood ah la hakiyo bixitaanka 3,000 oo Askari oo nabad ilaalin ah. “Si rasmi ah ayaa dib loogu dhigay muddo saddex bilood ah.”
Mar la weydiiyay in dowladda Soomaaliya ay dhayalsanayso mas’uuliyadda ka saaran amaankeeda kala wareegto Midowga Afrika iyo la dagaalanka Al-shabaab, Souef wuxuu sheegay in Soomaaliya ay ka jirto “rabitaanka siyaasadeed” ee ah in mas’uuliyadda amniga lagala wareego ciidamada Midowga Afrika ee ku-meel-gaarka ah ee Soomaaliya.
“Waxa ugu muhiimsan waa rabitaan siyaasadeed,” ayuu yiri. “Dabcan rabitaan siyaasadeed ayaa jira, ka dibna Soomaalidu ma rabaan in weligeed la caawiyo, waxay rabaan inay qaataan lahaanshaha, aad ayay u shaqeeyaan.”
Arbacadii, sarkaal sare oo ka tirsan dowladda Soomaaliya ayaa soo dhaweeyay joojinta dhimista ciidamada, balse wuxuu kalsooni ka muujiyay in dowladdu ay heli doonto ciidamo ku filan bilaha soo socda si ay dib ugu soo celiso waajibaadkeeda.
Kamaal Daahir Xasan Guutaale oo ah la taliyaha amniga qaranka ee ra’iisul wasaare Xamza Cabdi Barre ayaa sheegay in dowladdu ay tababartay 9,700 oo askari tan iyo markii ay xafiiska la wareegtay bishii May 2022-kii, waxaana sidoo kale lagu soo tababaray dalka Eritrea 3,000 oo askari oo dheeraad ah.
Waxa uu sheegay in ay jiraan ciidamo kale oo weli lagu tababaro dalka dibadiisa.
Horseed Media + VOA
