Hay’adda samafalka caafimaadka ee MSF ayaa sheegtay in lagu khasbay in ay joojiso shaqadii ay ka haysay xerada ballaaran ee ay ku nool yihiin dadka soo barakacay halkaas oo laga xaqiijiyey macaluul ka jirta gobolka Waqooyiga Darfur ee dalka Suudaan, taas oo keentay in kumanaan carruur ah oo nafaqo darro hayso ay halis ugu jiraan dhimasho.
MSF waxa ay sheegtay in ay joojisay dhaq-dhaqaaqii ay ka waday xerada Zamzam ka dib markii ay is hortaag ku sameeyeen gargaarkii ay ku hayeen agagaarka al-Fashir, taasi oo ay sameeyeen ciidamada gargaarka degdega ah (RSF), kuwaas oo go’doominayay magaalada muddo bilo ah, iyo sidoo kale ciidanka Suudaan oo si nidaamsan u xannibay gargaarkii meelaha ka baxsan gacanteeda.
Ciidanka iyo RSF waxa ay ku xayiran yihiin colaado ku dhawaad 18 bilood, taas oo dhalisay dhibaato bini’aadantinimo oo qoto dheer taas oo in ka badan 10 milyan oo qof laga saaray guryahoodii, hay’adaha Qaramada Midoobayna ay la daalaa dhacayeen sidii ay gargaar u gaarsiin lahaayeen.
“Sababtoo ah xannibaadda saadka MSF waxaa lagu qasbay in ay joojiso taageeridda xerada Zamzam oo ay ka tagtay 5,000 oo carruur ah oo nafaqo-darro hayso, oo ay ku jiraan 2,900 oo carruur ah oo ay hayso nafaqo-xumo ba’an, iyaga oo aan haysan taageero,” Claire San Filippo oo ka tirsan MSF ayaa hadal kooban ku sheegtay Jimcihii.
Horseed Media
