Ciidamada Israa’iil ayaa sii ballaariyay duullaanka ay ku hayaan waqooyiga Qaza, waxaana taangiyo ay gaareen cirifka waqooyi ee magaalada Gaza, iyagoo garaacay qaar ka mid ah degmooyinka xaafadda Sheekh Radwan, qoysas badanna waxay ku qasbeen inay guryahooda ka baxaan, sida ay sheegeen dadka deegaanka.
Dadka deegaanka ayaa sheegay in ciidamada Israel ay si wax ku ool ah u go’doomiyeen Beit Hanoun, Jabalia, iyo Beit Lahiya oo ku yaala waqooyiga fog ee magaalada Gaza, iyaga oo xiray isu socodka labada aag marka laga reebo ogolaansho ay u siiyeen qoysaska doonaya inay u hogaansamaan amarada daadgureynta oo ay ka baxaan saddexda magaalo.
Sagaal maalmood oo uu socday hawlgal ballaaran oo ay Israa’iil ka waday waqooyiga Gaza, ayaa xafiiska warbaahinta xukuumadda Gaza ee Xamaas ay maamusho waxa ay sheegtay in duqeymaha Israa’iil ay ku dileen ku dhawaad 300 oo falastiiniyiin ah. Waxa ay sheegtay in duqeymaha Israa’iil ay ku hayso guryaha rayidka ah iyo hoyga barakicinta ay uga gol leedahay in dadka deegaanka lagu khasbo in ay mar qura ka baxaan Gaza, taas oo ay Israa’iil beenisay.
Wasaaradda caafimaadka ee Gaza ayaa sheegtay in tobanaan qof la xaqiijiyay in ay ku dhinteen werarada ka dhacay deegaannada waqooyiga, iyadoo tobanaan kale laga cabsi qabo in ay ku dhinteen waddooyinka iyo burburka guryaha hoostooda oo aysan awoodin kooxaha caafimaadka.
Horseed Media
