Dacwad oogaha maxkamada ICC ayaa dalbanaya in la soo xiro taliyaha ciidamada militariga Myanmar sababo la xiriira xasuuqa Muslimiinta Rohingya
Dacwad oogaha Maxkamadda Caalamiga ah ee Dambiyada (ICC) ayaa Arbacadii shalay ku dhawaaqay in xafiiskiisu uu dalbanayo in la soo xiro taliyaha ciidamada Miyanmaar ee sababo la xiriira masaafurinta iyo xasuuqa Muslimiinta Rohingya.
“Baaritaan ballaaran, madax-bannaan iyo dhexdhexaadnimo ka dib, Xafiiskaygu wuxuu soo gabagabeeyey in ay jiraan sababo macquul ah oo lagu aamino in Sarreeye Guud ahna Ku-simaha Madaxweynaha Min Aung Hlaing, Taliyaha Guud ee Adeegyada Difaaca Myanmar, uu leeyahay mas’uuliyadda dembiyada ka dhanka ah bani’aadamnimada. masaafurinta iyo dhibaataynta muslimiinta Rohingya ee Myanmar,” ayuu Karim Khan ku yidhi hadal uu soo saaray.
Sida uu sheegay dacwad oogaha, dambiyadan ayaa dhacay intii u dhaxaysay Agoosto 25, 2017 iyo Dec. 31, 2017, waxaana geystay ciidamada qalabka sida ee Myanmar, oo ay taageerayaan booliska qaranka, booliska ilaalada xuduudaha iyo sidoo kale dad rayid ah.
Isagoo xusay inay tahay codsigii ugu horreeyay ee amar qabasho oo ka dhan ah sarkaal sare oo ka tirsan dowladda Myanmar oo xafiiska dacwad oogaha uu soo saaro.
Khan waxa uu carabka ku adkeeyay in codsigu ku qeexay cadaymo badan oo kala duwan oo laga helay ilo badan sida markhaatiyo, caddaymo dokumenti ah iyo agab saynis, sawiro iyo muuqaalo la xaqiijiyay.
“Waxaan si gaar ah u doonayaa inaan u muujiyo mahadnaq qoto dheer oo aan u hayo shacabka Rohingya. In ka badan hal milyan oo ka tirsan bulshadooda ayaa lagu qasbay inay ka cararaan rabshadaha Myanmar. Waxaan u mahadcelineynaa dhammaan dadka markhaatifurka iyo taageerada u fidiyay Xafiiskayga, kuwa nala wadaagay sheekadooda, kuwa na siiyay macluumaadka iyo agabka, “ayuu yiri.
Horseed Media
