Taliyaha cusub ee ciidanka xoogga dalka Soomaaliyeed Sareeye Gaas Odowaa Yusuf Raage ayaa xilkii kala wareegay Taliyihii hore Sareeye Gaas Ibraahim Sheekh Muxiyadiin.
Taliyaha cusub ee Ciidanka Xoogga dalka Soomaaliyeed ayaa 10 Nofeembar loo magacaabay S/Gaas Odowaa Yusuf Raage, xilkaan oo uu horey u hayn jirey.
Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa xilka u kala wareejiyey labada taliye.
Raysalwasaare Xamse oo khudbad ka jeediyey munaasabadii xil wareejinta ayaa ka sheekeeyey guulihii ciidamadu gaareen.
Ra’iisul Wasaaraha ayaa sheegay in labadi sano ee lasoo dhaafay ciidanku xorreeyeen deegaanno badan oo ay argagixisadu haysteen, isla markaana ay Xukuumaddu gaarsiisay adeegyadii asaasiga ahaa ee bulshadu u baahnayd, wuxuunna sheegay in taliyaha cusub laga doonayo dardargelinta dagaalka dalka lagaga xorreynayo argagixisada iyo kooxaha nabadda diiddan isagoo tilmaamay inay muhiim tahay xoojinta iyo tayeynta dhismaha qeybaha kala duwan ee ciidamada qalabka sida, la wareegidda amniga dalka iyo in ciidanka laga wacyigaliyo waxyaabaha maanka dooriya.
Waxaa xusid mudan labada taliye ee xilka loo kala wareejiyey in sidaan oo kale bishii June 2023, Gen Odowaa ku wareejiyey taliye Gen Ibraahim Muxyadiin oo uu isla maanta sanad iyo bilo kadib xilkii kala wareegay.
HORSEED MEDIA
