© 2023 Horseed Media Group

golis telecom

Dowladda Soomaaliya oo Mareykanka kala hadashay tayeynta wax soo saarka beeraha

Ergeyga gaarka ah ee Madaxweynaha JFS u qaabilsan arrimaha Gurmadka Abaaraha Cabdiraxmaan Cabdishakuur Warsame, ayaa magaalada Geneve ee waddanka Switzerland kula kulmay wafdiga Maraykanka ee ka qaybgalay furritaanka kalfadhiga 113-aad ee golaha IOM.

Waftiga waxaa hor kacayay ku xigeenka Kaaliyaha Wasiirka Arrimaha dibedda Maraykanka ee arrimaha bani’aadannimada, Elizabeth H. Campbell  iyo Amy E Pope oo ah ku xigeenka IOM, haatanna u sharraxan xilka Agaasimaha Guud ee IOM.

Ergeyga ayaa dawladda Maraykanka uga mahad celiyey kaalinta laxaadka leh ee ay ka qaateen gurmadka abaaraha, isaga oo dhanka kale ka codsaday in dawladda Soomaaliya lagala shaqeeyo ka hortaga soo noqnoqashada abaaraha, taasoo ku imaan karta in la maalgeliyo mashaariic wax tar leh dadka oo abaaraha looga hortago sida; tayeynta wax soo saarka beeraha, xoolaha iyo daaqa.

Dhanka kale Ergeyga gaarka ah ee Madaxweynaha JFS u qaabilsan arrimaha Gurmadka Abaaraha Cabdiraxmaan Cabdishakuur Warsame ayaa ku xigeenka Kaaliyaha Wasiirka Arrimaha dibedda Maraykanka kala hadlay hirgeliyo istiraatiijiyadda biyaha ee dawladda Soomaaliya, lana maalgeliyo kallumaysiga, dhaqashada xoolaha iyo dhiraynta degaanka.

Dawladda Maraykanka ayaa dhinacooda ballanqaaday in Soomaaliya kala shaqaynayaan sidii ay mashaariicdaasi ku hirgelin lahayd. Ergayga waxaa ku wehliyey kulanka saraakiil ka socota xafiiska ergeyga iyo diblomaasiyiin ka tirsan Safaaradda Soomaaliya ee dalka Switzerland.

Horseed Media