Madaxweynaha Jamhuuriyadda Federaalka Soomaaliya Maxamed Cabdullaahi Farmaajo ayaa saxiixay heshiiskii siyaasadeed ee doorashooyinka dadban kaas oo golaha shacabka iyo Aqalka Sare ay si wadajir ah cod aqlabiyad ah ku ansixiyeen 26-kii Sebteembar 2020.
War qoraal oo kasoo baxay madaxtooyada Soomaaliya ayaa lagu sheegay inuu madaxweynaha heshiiskan ku tilmaamay mid caddeyn buuxda u ah sida ay uga go’an tahay maamulka uu hoggaamiyo sii ambaqadidda hannaanka dimuqraadiyadeed ee dalka iyo qabsoomidda doorasho saldhigeedu yahay heshiiskii Muqdisho ay ku gaareen madaxda heer federaal iyo heer dowlad goboleed 17-kii Sebteemar 2020.
“Waxaan dalka u jihaynay doorasho. Laga soo bilaabo 1-dii Bishii Oktoobar ee sanadkan oo aan la saxiixanay Madaxda Dowladda Goboleedyada dalka Heshiiskii Habraacyada doorashooyinka, waxaan qaadnay tallaabooyinka Heer Federaal ee ku aaddan qabsoomidda doorashada iyo dhaqan gelinta dhammaan qodobbada ku jira Heshiiska Siyaasadeed ee Jiheynta Doorashada Baarlamaanka Federaalka.”
Farmaajo
Madaxweyne Farmaajo ayaa ku bogaadiyey madaxda dowlad goboleedyada iyo maamulka gobolka Banaadir dadaalkii ay ku bixiyeen in heshiis laga gaaro wadahadalladii ku saabsanaa hannaanka doorashooyinka dalka ee ku qabsoomay Samareeb iyo Muqdisho.
Sidoo kale, Madaxweynaha ayaa uga mahadceliyey guddoonka iyo xildhibaannada golaha shacabka iyo aqalka sare dhammeystirka habraacii uu sharciga ku noqday Heshiiskii Siyaasadeed ee Doorashooyinka.
Ugu dambeyntii, Madaxweyne Maxamed Cabdullaahi Farmaajo ayaa faray xukuumadda dardargelinta doorkeeda ku aaddan fududeynta qabsoomidda doorasho waafaqsan heshiiskan ay ansixiyeen Baarlamaanku, kuna meel maray saxiixa Madaxweynaha.
Horseed Media
