© 2022 Horseed Media Group

golis telecom

Ugu yaraan 15 qof oo muhaajiriin ah ayaa ku dhintay biyaha Giriiga

Shares19

Laba doonyood oo ay saarnaayeen 140 qof ayaa ku degtay biyaha Giriiga. Dabaylo xooggan ayaa dib u dhigay hawlgallada baadi-goobka iyo samatabbixinta, sida ay sheegeen ilaalada xeebaha Giriigga.

Mid kamid ah doomaha oo ay saarnaayeen ilaa 40 qof ayaa ku degtay jasiiradda Lesbos. Shan qof ayaa la soo badbaadiyay ilaa hadda, waxaana saddex qof u suurtagashay inay fuulaan dhagaxaan ku yaalla deegaanka.

Doon kale oo ah nooca shiraaca oo ay saarnaayeen ilaa 95 qof oo tahriibayaal ah ayaa ku degtay goor dambe oo Arbacadii ah meel u dhow jasiiradda Kythira. Ku dhawaad ​​30 qof ayaa laga soo badbaadiyay halkaasi, sida ay sheegtay AP.

-Waxaan aragnay doonta oo dhagxaanta ku dhacaysa iyo dadka oo fuulaya si ay naftooda u badbaadiyaan. Waxay ahayd muuqaal aan la qiyaasi karin. Dadka deggan halkan waxay u dhaadhaceen dekedda si ay isugu dayaan inay caawiyaan dadka la soo badbaadiyey, Martha Stathaki, oo deggan jasiiradda, ayaa u sheegtay wakaaladda wararka AP.

Inta badan muhaajiriinta gaareysa Giriiga waxay ka soo safraan dalka ay jaarka yihiin ee Turkiga, balse dadka wax tahriibiya ayaa bilihii la soo dhaafay baddalay waddooyinkooda, iyagoo isku dayaya inay ka fogaadaan biyaha aadka loo ilaaliyo ee ku xeeran jasiiradaha Giriiga ee u dhow xeebaha Turkiga.

Lama sheegin dalalka ay ka soo jeedaan dadka la soo badbaadiyey, waxaa la aaminsan yahay in Soomaali badan ay weli ku mashquulsan yihiin tahriibta iyo sidii ay u gaari lahaayeen qaarada Yurub.

Horseed media