Lubnaan ayaa sheegtay in duqaymaha cirka ee Israa’iil Sabtidii ay ku dhinteen in ka badan 55 qof, oo badankoodu ay ka dhaceen badhtamaha Beirut.
Duqeymo xooggan oo dhanka cirka ah oo Israel ay ka geysatay bartamaha magaalada Beirut ee Basta subaxnimadii Sabtida, ayaa waxaa ku dhintay ugu yaraan 55 qof, halka 100 qof oo kalena ay ku dhaawacmeen, mid ka mid ah weerarradii ugu xumaa ee lagu qaaday bartamaha caasimadda Lubnaan. Duulaanka ka hor waaberiga, oo dhacay abaare 4-tii subaxnimo, ayaa gabi ahaanba dumiyay dhismo siddeed dabaq ah, waxaana uu ka tagay bohol aad u weyn oo ku yaalla bartamaha degmada taariikhiga ah.
Falanqeeyayaasha militariga ayaa soo jeedinaya in weerarkan la sheegay in loo adeegsaday bambaanooyinka bunker-buster, laga yaabo in lala beegsaday taliyaha sare ee militariga Xisbullaah Mohammed Haidar, in kasta oo Xisbullaah ay beenisay in mid ka mid ah hogaamiyayaasheeda uu goobta joogay.
Weerarkan ayaa ku soo aadaya xili Ergeyga gaarka ah ee Maraykanka Amos Hochstein uu hogaaminaayo dadaalada diblumaasiyadeed ee lagu dhexdhexaadinayo xabbad joojinta Israel iyo Xisbullah. Falanqeeyayaasha qaar ayaa u arka in waqtiga weerarka uu yahay tallaabo istaraatiiji ah oo lagu doonayo in laga faa’ideysto wada xaajoodyada socda, inkastoo Israa’iil aysan si rasmi ah uga hadlin howlgalka.
Maamulka caafimaadka ee Lubnaan ayaa sii wada baadigoobka dad ka badbaaday burburka, iyaga oo ka digaya in dhimashadu ay korodho. Weerarkan ayaa dhaleecayn xooggan kala kulmay saraakiisha Lubnaan, kuwaas oo ku eedeeyay Israa’iil in ay duqaymo aan loo meel dayin ka gaysanayso goobaha rayidka ah.
