Madaxweynaha Ukraine Volodymyr Zelensky oo Axadii booqasho ku tagay dalalka Denmark iyo Netherlands ayaa ku tilmaamay mid taariikhi ah go’aanka ay labada dal ku wareejiyeen diyaaradaha F-16 ee ka caawinaya Ukraine la dagaalanka duulaanka Ruushka.
![](https://horseedmedia.net/wp-content/uploads/2023/08/Den-Nl-diyarado-ukraine-210823-3-jpg.webp)
Isagoo ka hadlayay saldhig ciidamada cirka Holland ku leeyihiin Eindhoven, halkaas oo isaga iyo Ra’iisul wasaaraha Holland Mark Rutte ay kormeereen diyaaradaha F-16, Zelensky wuxuu sheegay in go’aanka uu ahaa “mid taariikhi ah oo na dhiirigelinaya Ukraine”.
Jimcihii, Holland iyo Denmark waxay sheegeen in Maraykanku u oggolaaday inay diyaaradaha F-16 ee Maraykanku sameeyo ku wareejin karaan dalka Ukraine. Oggolaanshaha Washington ayaa loo arkayay inay tahay mid xoojinaysa Kyiv, in kasta oo diyaaradahan la rajeenayo inay hawlgalaan 18 bilood kadib.
![](https://horseedmedia.net/wp-content/uploads/2023/08/Den-Nl-diyarado-ukraine-210823-1-jpg.webp)
Ukraine ayaa muddo dheer ka codsaneysay NATO diyaaradahan si ay u adkeyso difaaceeda cirka. Waxay dhawaan qaaday weerar rogaal celis ah oo muddo dheer la sugayay oo ka dhan ah ciidamada Ruush-ka.
Dowladaha Holland iyo Denmark ayaa sidoo kale ku lug leh isbaheysi ka shaqeynaya sidii ay u tababari lahaayeen duuliyayaasha Ukraine si ay u duuliyaan diyaaradahan casriga ah.
Horseed Media