Lucy Letby waa dilaagii ugu xumaa ee carruurta ee Britain waqtiyadan casriga ah.
Kalkaaliso caafimaad oo 33 jir ah oo ku nool Ingiriiska ayaa lagu xukumay xabsi daa’in, ka dib markii ay dishay toddobo carruur ah oo markaas dhashay iskuna dayday in ay ku disho ku dhawaad tiro badan magaalada Chester ee Ingiriiska. Had iyo jeer way diidi jirtay wax khalad ah in ay caruurta ku sameysey.
Lucy Letby oo 33-jir ah waxay la shaqeysay carruur xanuunsan iyo kuwa xiligoodi ka hor dhashey oo dhicis ah isbitaal ku yaal waqooyi-galbeed ee England. Isla markaa, tiro aan caadi ahayn oo dhimasho ah ayaa ka dhacday qaybta dhallaanka intii u dhaxaysay taariikhdu markey ahayd Juun 2015 iyo Juun 2016.
Sannadkii 2018, laba sano ka dib markii ay ka tagtay cusbitaalka Chester, ee koonfurta Liverpool, waxaa lagu xidhay gurigeeda. Waxaa lagu eedeeyay in carruurtan ay ku durtay hawo ay u raacisey dhiigooda, isla markaana ay si xad dhaaf ah u cabsiisey caanaha, ayna ku sumeysay insulin.
19-kii Agoosto, waxaa lagu helay dambi ah dilka toddobo carruur ah oo dhawaan dhashay iyo isku day dil lix ilmood oo kale. Isniinta maanta ah, ayaa lagu dhawaaqay xukunka, kaasoo noqon doona xabsi daa’in, iyadoo aan suurtagal ahayn in la sii daayo abidkeed.
“Waxaa kugu jirta xaasidnimo qoto dheer oo xuduud la leh murugada. Wax qoomamo ah ma lihid. Ma jiraan duruufo lagu khafiifinayo xukunkaaga” ayuu yiri xaakimku markii uu xukunka ku dhawaaqayay.
Lucy Letby sidaas darteed waa dilaagii ugu xumaa ee carruurta ee Britain waqtiyadan casriga ah.
Qoysas badan oo caruurtoodu ka badbaadeen dilka laakiin ay noqdeen naafo ayaa maxkamadda ka hor akhriyey khudbado murogo leh, waxay sheegeen in caruurtoodi badbaadey laakiin ay dhibaato joogto ah ilaa xiligan la nool yihiin kadib markii ay noqdeen kuwo indha beelay ama naafo maskaxda ka ah oo caawinaad joogto ah u baahan.
Letby waxay diiday in ay timaado maxkamada maanta oo isniin ah marka xukunka la ridaayey. Waxay ka dhalisay UK dood ku saabsan in tani ay tahay mid aan wanaagsaneyn sharcigana wax laga beddelo oo khasab looga dhigo dhegeysiga dacwadda, oo aan baryo ahayn si ay u dhegaysato dadkii ay caruurta ka laysey, BBC ayaa ku warrantay .
Haatan waxa socda baadhitaan lagu eegayo 4,000 oo caruur ah oo laga yaabo inay haweenaydu xiriir la samaysay.
Hanad Askar
Horseed media
