Saraakiisha Ruushka ayaa sheegay in markab shidaal uu ku dhacay weerar diyaarad aan duuliye lahayn oo…
Saraakiisha Ruushka ayaa sheegay in markab shidaal uu ku dhacay weerar diyaarad aan duuliye lahayn oo ka dhacay marinka Kerch Strait ee gobolka Crimea. Weerarkan ayaa daba socda hal maalin kadib weerar lagu qaaday markab ay leeyihiin ciidamada badda oo halkaasi ka agdhawaa.
Markab nooca shidaalka qaada ah oo laga leeyahay dalka Ruushka ayaa subaxnimadii hore ee sabtida waxyeelo ka soo gaadhay marinka Kerch Strait ee u dhow buundada isku xidha gobolka Crimea ee Ruushku haysto iyo dhul weynaha Ruushka.
Kooxda samatabbixinta badda ee fadhigoodu yahay dekedda Novorossiysk ee badda madow ayaa sheegay in loo diray si ay gacan uga geystaan dhaqaajinta markabka, kaas oo awoodi waayey in uu iskiis u shaqeeyo, wakaaladda wararka ee Ruushka ee TASS ayaa sheegtay.
Ma jiro wax shidaal ah oo ka daatay markabka oo ay saarnaayeen 11 qof, sida ay sheegtay TASS.
Markabka SIG ayaa waxaa soo gaaray dalool dhanka biyaha ee aagga qolka matoorka, “waxaa loo malaynayaa in uu ka dhashay weerar ay geysatay diyaarad aan duuliye lahayn,” Wakaaladda Federaalka ee Gaadiidka Biyaha Badda iyo Gudaha ayaa ku sheegtay Telegram. “Markabku wuu sabbaynayaa hadda.”
Saraakiisha uu Ruushka u magacaabay gobolka Crimea ayaa weerarka ku eedeeyay diyaaradaha aan duuliyaha lahayn ee Ukraine. Ukraine marar dhif ah ayay si toos ah u sheegataa mas’uuliyadda weerarrada diyaaradaha aan duuliyaha lahayn.
Weerarkii ugu dambeeyay ee ka dhacay Badda Madow ayaa yimid maalin kadib markii Ukraine ay sheegtay in ay duqeyn dhanka badda ah ku qaaday Markab ay leeyihiin ciidamada badda Ruushka oo ku sugnaa saldhiga Novorossiysk ee koonfurta Ruushka.
Horseed Media
