Madaxweynaha dalka Turkiga Recep Tayyip Erdoğan ayaa waxaa soo gaaray dharbaaxo lama filaan ah doorashadii maalintii…
Madaxweynaha dalka Turkiga Recep Tayyip Erdoğan ayaa waxaa soo gaaray dharbaaxo lama filaan ah doorashadii maalintii Axada, iyadoo natiijadii ugu horeysay ay muujineyso in xisbiga mucaaradka ah ee ugu weyn dalkaasi uu guulo ka gaaray doorashada heer gobol ee dalkaasi.
Mr Erdogan ayaa ballan qaadey inuu waa cusub u gali doono caasimada Turkiga oo ay ku nool yihiin ku dhawaad 16 milyan oo qof, balse duqa magaalada Istanbul ee xilka haya kana tirsan xisbiga mucaaradka e Jamhuuriga ayaa helay in ka badan 50% codadkii la dhiibtay, isagoo musharaxii xisbiga madaxweynaha ee AK Party kaga adkaaday 11 dhibcood iyo ku dhawaad hal milyan oo cod.
CHP ayaa guushii ugu waynayd ka helay magaalada Istanbul, halkaas oo Ekrem Imamoğlu dib loogu doortay duqa magaalada. Magaalada ugu weyn Yurub, Istanbul waxay ka dhigan tahay 18 boqolkiiba dadka Turkiga iyo saddex meelood meel dhaqaalihiisa.
Khudbadii guusha ee uu jeediyay galabnimadii Axadda, Imamoğlu wuxuu sheegay in natiijada doorashada deegaanka ay saameyn weyn ku yeelan doonto mustaqbalka siyaasadeed ee dalka.
Xisbiga CHP – xisbiga Jamhuuriga – ayaa mar kale ku guuleystay Izmir, Adana iyo goobta loo dalxiis tago ee Antalya. Waxa kale oo ay la wareegtay gacan ku haynta magaalada afraad ee ugu weyn Turkiga Bursa iyo Balikesir oo ku taal waqooyi-galbeed, iyo sidoo kale Adiyaman, oo uu si ba’an ugu dhuftay dhulgariirkii labanlaabmay ee sannadkii hore ka dhacay koonfur-bari.
HORSEEDMEDIA
