In ka badan 1,000 qof ayaa sanadkan ku dhintay xajka, sida ay sheegtay wakaaladda wararka ee…
In ka badan 1,000 qof ayaa sanadkan ku dhintay xajka, sida ay sheegtay wakaaladda wararka ee Reuters, kadib markii kulayl daran uu hareeyay ku dhawaad laba milyan oo qof oo ka qeyb qaatay gudashada waajibaadka xajka ee sanadlaha ah ee Muslimiinta.
Dadka dhintay ayaa u badnaa Masaari. Ilaha ammaanka iyo caafimaadka ayaa wakaaladda wararka ee Reuters u sheegay Axadii in tirada dhimashada Masar ay gaartay 672 qof, halka 25 kalena la la’yahay.
236 qof oo Indonesian ah ayaa dhintay, sida lagu sheegay xogta dawladda Indonesia, halka hay’adda arrimaha dibadda ee Hindiya ay sheegtay in 98 muwaadiniin Hindi ah ay ku dhinteen xajka.
Dhimasho kale ayaa waxaa soo sheegay Tunisia, Jordan, Iran, iyo Senegal, taasoo ka dhigeysa tirada guud ee sanadkan ugu yaraan 1,114 qof, sida ay sheegtay wakaaladda wararka ee Reuters.
Unug ka tirsan xasaradaha Masar oo loo xilsaaray inay baaraan xaaladda ayaa Sabtidii sheegay inay hakiyeen shatiyada 16 shirkadood oo dalxiis ah, waxayna u gudbiyeen dacwad oogaha guud, iyagoo ku eedeeyay inay mas’uul ka yihiin dhimashada ay sheegeen inay inta badan ka mid yihiin xujeyda aan diiwaangashanayn nidaamka rasmiga ah.
Horseed Media
