Hay’adda UNOPS oo dayactir ku samayneysa 6 Isbitaal oo Soomaaliya ku yaala

Hay’adda UNOPS (United Nations Office for Project Services) iyo wasaaradda caafimaadka dowladda federaalka ayaa iska kaashanaya dayactir ballaaran oo lagu samaynaayo ilaa lix isbitaal oo ku yaala Soomaaliya. Hindisahan iskaashiga ah ayaa si weyn u wanaajin doona nidaamka daryeelka caafimaadka Soomaaliya iyo awooddeeda wax looga qabanayo xaaladaha degdegga ah, oo ay ku jiraan shoogga cimilada, sida lagu sheegay war-saxaafadeed ka soo baxay

Iyada oo qayb ka ah dadaallada lagu caawinayo wax ka qabashada goldaloolooyinka kaabayaasha muhiimka ah iyo horumarinta adeegyada daryeelka caafimaadka ee Soomaaliya oo dhan, UNOPS, Dowladda Federaalka Soomaaliya gaar ahaan Wasaaradda Caafimaadka iyo Bangiga Adduunka ayaa iska kaashaday dayactirka lix isbitaal oo gobollada dalka ah:

1. Isbitaalka guud ee Boosaaso – Puntland
2. Isbitalka Guud ee Galmudug – Dhuusamareeb, Dowlad Goboleedka Galmudug
3. Isbitalka Guud ee Degmada Beledweyne – Dowlad Goboleedka Hirshabeelle
4. Isbitaalka Gobolka Baay – Baydhabo, Dowlad Goboleedka Koonfur Galbeed
5. Isbitaalka Forlaanini – Muqdisho, Maamulka Gobolka Banaadir (BRA).
6. Isbitaalka Referral ee Degmada Garbahaareey – Dowlad Goboleedka Jubbaland

Hindisaha $12.5 milyan – oo qayb ka ah Mashruuca Tallaalka Degdegga ah ee Bangiga Adduunka ee Soomaaliya ee COVID-19 Maalgelinta dheeriga ah- waxay ka koobnaan doontaa dib-u-habeyn ballaaran, shaqooyinka rayidka ah, iyo rakibidda qalabka caafimaadka ee muhiimka ah si kor loogu qaado awoodda wax-ka-qabashada degdegga ah ee isbitaallada. Mashruucu wuxuu sidoo kale isku dari doonaa tallaabooyinka u adkeysiga cimilada, sida hababka ka hortagga fatahaadaha, qaababka u adkeysiga dabaysha, iyo hababka qaboojinta dadban, si loo hubiyo in isbitaallada ay u qalabaysan yihiin inay u adkeystaan caqabadaha cimilada la xiriira.

Madaxa UNOPS Ala’a Nemer, Madaxa UNOPS ee Soomaaliya oo ka hadlaya mashruucan ayaa yiri: “Waan ku faraxsanahay in aan Wasaaradda Caafimaadka kala shaqeyno dadaalkan muhiimka ah ee lagu xoojinayo nidaamka daryeelka caafimaadka Soomaaliya,”

“Markaan bilownay mashruucan dib-u-habaynta isbitaallada, waxaan qaadeynaa tallaabooyin muhiim ah oo ku aaddan dhismaha kaabayaal daryeel caafimaad oo adkeysi leh oo ka jawaabi doona kuwaas oo gaarsiin doona adeegyada muhiimka ah ee daryeelka caafimaadka bulshada kuwaas oo aadka ugu baahan, gaar ahaan kooxaha ugu nugul. Waxa aanu go’aansanay in aanu gaarno yoolkan aanu ku doonayno in aanu ku baahinno adeegyada caafimaad ee dalka oo dhan,” ayuu yidhi Wasiirka Caafimaadka Dr. Cali Xaaji Aadan.

Horseed Media