Qatar ayaa laga yaabaa inay xirto xafiiska siyaasadda ee Xamaas taasoo qeyb ka ah dib u…
Qatar ayaa laga yaabaa inay xirto xafiiska siyaasadda ee Xamaas taasoo qeyb ka ah dib u eegis ballaaran oo lagu sameynayo doorkeeda dhexdhexaadinta dagaalka u dhexeeya Israa’iil iyo kooxda Falastiiniyiinta, sida uu sheegay sarkaal la socda qiimeynta dowladda Qatar.
Dawlada Qatar waxay miisaamaysay inay u ogolaato Xamaas inay sii wado shaqada xafiiska siyaasada, dib u eegista balaadhana waxa ka mid ah inay ka fiirsato inay sii wado dhex dhexaadinta khilaafka todobada bilood ah iyo in kale, sida uu sarkaalku u sheegay wakaalada wararka ee Reuters.
Qatar ayaa bishii hore sheegtay inay dib u qiimaynayso doorkeeda dhexdhexaadinta wadahadalada dadban ee Israel iyo Xamaas, iyadoo sheegtay inay ka walaacsan tahay in dadaalkeeda ay wiiqaan siyaasiyiin doonaya inay dhibco helaan.
Warbixin uu Jimcihii soo saaray Wargeyska [The Washington Post] ayaa soo xigtay sarkaal Mareykan ah oo aan la magacaabin, isagoo sheegay in Mareykanka u sheegay Qatar inay ka saarto dalkeeda Xamaas haddii ay kooxdu sii waddo diidmada heshiiska xabbad-joojinta ee Israa’iil.
Wafdi ka socda Xamaas ayaa maanta oo Sabti ah gaaray magaalada Qaahira ee Masar, si ay u xoojiyaan wadahadallo ku saabsan suurtagalnimada xabbad-joojinta Gaza taasoo keeni karta siideynta la-heystayaasha Israa’iil oo ay kooxda qafaalatay 7dii Oktoober, sida uu sarkaal Xamaas ka tirsan u sheegay wakaaladda wararka ee Reuters.
Horseed Media
