In ka badan 40 qof ayaa ku dhimatay kadib markii dooni ay saarnaayeen dad tahriibayaal ah ay degtay, sida ay warbaahinta Talyaaniga u sheegeen dad ka badbaaday doonida degtay. Saddex caruur ah ayaa la sheegay in ay la socdeen doonta.
Wakaalladda Wararka Talyaaniga ee ANSA iyo Telefishinka RAI ayaa soo xiganaya dad ka badbaaday doonidaasi, kuwaasi oo sheegay in doonidaasi ay ka soo shiraacday magaalladda Sfax ee dalka Tunisia, kuna sii jeeday dalka Talyaaniga.
Afar qof oo badbaaday ayaa waxaa soo badbaadiyay markab xamuul oo laga leeyahay dalka Malta, waxaana ciidamada ilaalada xeebaha Talyaaniga u qaaday Lampedusa.
Dadka la badbaadiyay oo kala ahaa saddex nin iyo haweeney u kala dhalatay Ivory Coast iyo Guinea, ayaa sheegay in 45 qof ay la socdeen doonta iyo saddex carruur ah.
Kaliya 15 qof ayaa xirnaa jaakadaha badbaadada, markii baddu ku kacdey oo dabaylo xoog leh ay halkaas ka dhaceen.
Doontan ayaa la sheegay inuu ka soo abxay xeebaha Tuuniisiya maalintii Khamiistii lasoo dhaafay, wuxuuna socday ku dhawaad 6 saacadood ka hor inta uusan la rogman mowjado aad u badan.
Sida laga soo xigtay mas’uuliyiinta Talyaaniga, in ka badan 90,000 oo qof ayaa gaaray xeebaha Talyaaniga sannadkan ka dib markii ay ka soo gudbeen badda Mediterranean-ka.
Tani waxay ka dhigan tahay koror ka badan labanlaab marka la barbardhigo isla wakhtigaas sannadkii hore.
Horseed Media
