Ugu yaraan 2,300 oo qof ayaa ku dhintay magaalo ku taal bariga Liibiya oo kali ah ka dib markii dabaylo xooggan ay sababeen daadad waxyeello u geystay dhammaadkii isbuucii hore, sida ay sheegeen hay’adaha gargaarka degdegga ah Talaadadii.
Saraakiisha maxalliga ah ayaa sheegay in ilaa 5,000 ay wali maqan yihiin magaalada, Derna, oo ay ku nool yihiin 125,000 oo qof.
“Meydadka ayaa meel walba yaal – badda, dooxooyinka, dhismayaasha hoostooda,” Hichem Abu Chkiouat, oo ah wasiirka rayidka ee maamulka ka taliya bariga, ayaa u sheegay Reuters.
“Ma buun buuninaayo marka aan leeyahay 25% magaalada waa la waayey, dhismayaal badan oo badan ayaa dumay.”
Koox ka tirsan kooxaha gurmadka deg degga ah ayaa ku sugnaa Derna tan iyo Isniintii, sida uu wakaaladda wararka ee AFP u sheegay Osama Ali, oo ah afhayeenka ciidamada gurmadka ee fadhigoodu yahay Tripoli.
Kooxaha gurmadka ayaa bilaabay in ay boqolaal meydad ah ka soo saaraan burburka kadib markii roobab lixaad leh oo da’ay dhamaadkii todobaadka ay sababeen in biyo xireeno ay jabaan, kuwaas oo qaaday dhamaan degmooyinka.
“Dhimashadu aad ayay u badan tahay waxaana laga yaabaa inay kumanaan gaarto,” Tamer Ramadan, oo ah madaxa wafdiga IRFC ee Liibiya, ayaa u sheegay suxufiyiinta horraantii Talaadada.
“Waxaan ka xaqiijin karnaa ilo xog-ogaal ah oo madax bannaan in tirada dadka la la’yahay ay gaarayaan 10,000 oo qof ilaa hadda,” ayuu raaciyay.
Dhanka kale, madaxa bini’aadantinimada ee Qaramada Midoobay Martin Griffiths ayaa ku qoray X in kooxaha gurmadka sidoo kale la abaabulayo si ay gacan uga geystaan dhulka.
Liibiya waxa u kala qaybsan maamulo iska soo horjeeda oo galbeed iyo bari ah.
Magaalada dekedda leh ee bari ee Derna, oo ay mar haysteen kooxaha xagjirka ah ee Islaamiga ah sannadihii ka dambeeyay markii xukunka laga tuuray Moammar Gaddafi , ayaa ka mid ahayd meelaha ugu daran ee ay roobabku saameeyeen.
Galbeedka waxaa ka talisa dowlad caalamku aqoonsan yahay fadhigeedu yahay Tripoli, halka barigana uu ka taliyo maamul gooni ah.
Horseed Media
